АКАФИСТ  ПРЕПОДОБНОМУ ИЛИЕ ИЗ ГРАДА МУРОМА, ПЕЧЕРСКОМУ ЧУДОТВОРЦУ

(Память 19 декабря/1 января)

Кондак 1

Избранный воеводо ратоборцев за веру Хри­стову и преславный угодниче Божий, крепкий победителю врагов и чудотворче предивный, преподобне отче наш Илие, прославляюще Господа славы, давшаго тя всем православ­ным заступника и молитвенника, похвальная восписуем ти пения. Ты же, предстоя престо­лу Святыя Троицы, от всяких зол и напастей сохраняй с верою и любовию зовущих ти:

Радуйся, преподобне отче Илие, земли Русския славный заступниче.

Икос 1

Ангелов и человеков Творец призва тя, угодниче Божий Илие, да будеши всем людем образ верности и мужества во бранех со враги, видимыми же и невидимыми. Мы же, прославляюще подвиги и труды твоя, благо­говейно зовем ти:

Радуйся, от рождения твоего Богом избран­ный; радуйся, в болезни безропотно, с благодарностию Богу жительствовавый.

Радуйся, при крещении имя великаго про­рока Божия Илии получивый; радуйся, благодатию Христовою от недуга тяжкаго исце­ленный.

Радуйся, на воинское служение Господем призванный; радуйся, избрание твое подвиги многими оправдавый.

Радуйся, пророку Илии в ревности по Бозе и спасении людей подражавый; радуйся, лю­бовь нелицемерную от народа своего снискавый.

Радуйся, душу свою за други полагавый; радуйся, обеты иночества житие свое увенчавый.

Радуйся, в сонме преподобных отцев киево-печерских прославленный; радуйся, к во­инству небесному сопричтенный.

Радуйся, преподобне отче Илие, земли Русския славный заступниче.

Кондак 2

Видевше родители тебе, преподобне, тридесять лет в разслаблении суща, скорбию объ­яты быша, обаче с верою и надеждою моляху единаго и истиннаго Бога, подающаго страж­дущим исцеление, и вкупе с тобою воспеваху Ему: Аллилуиа.

Икос 2

Разум небесный свыше даровася тебе, егда глас странников Божиих услышал еси и по слову их, востав со одра твоего, аки николиже болезнь имевый, в радости неизглаголанней благодарил еси Безмезднаго Врача твоего, Христа. Мы же, дивящеся таковому о тебе Божию промышлению, со умилением вопием ти:

Радуйся, благочестивых родителей твоих чадо Богом данное; радуйся, сердец их боголюбивых надеждо и утешение.

Радуйся, радости родителей твоих исполнивый, Бога славяще; радуйся, благоверия предков твоих наследниче.

Радуйся, от юности Господа возлюбивый; радуйся, словеса Христовы жизнию исполнивый.

Радуйся, града Мурома духовное украше­ние; радуйся, всея Руси благодатное озаре­ние.

Радуйся, крепости Божией тезоимените; радуйся, яко по имени твоему и житие твое блаженно бысть.

Радуйся, яко о тебе радуются Ангели на небеси; радуйся, яко о тебе Бога славят человецы на земли.

Радуйся, преподобне отче Илие, земли Русския славный заступниче.

Кондак 3

Силою свыше укрепився, услышал еси, блаженне, глас мужей, Богом посланных: «Будеши ты, Илие, богатырь великий, и смерть тебе во бранех не писана есть». Ты же, восприяв крепость телесную, направил еси стопы своя на труд земледельника. Бог же укрепляше тя, поспешствуя в трудех твоих. Темже молися Богу, времена плодоносна по­дающему нам, и укрепи молитвами твоими всех, труждающихся боготщательно на земли и поющих Ему: Аллилуиа.

Икос 3

Имея помышление в сердце своем послужити Христу, даровавшему тебе исцеление и силу велию, изшел еси из дому родителей твоих, меч в руце восприим, противоополчился еси силам вражиим за веру право­славную и за землю Русскую. Темже и мы, ублажающе благое твое изволение, с любовию восхваляем тя сице:

Радуйся, яко смотрением Божиим тридесять лет в болезни неисцельней терпению и смирению навыкл еси; радуйся, совершенно воле Божией покоривыйся.

Радуйся, хождение приемый ногама, да идеши на стези правыя; радуйся, владение приемый рукама, да твориши дела богоугодныя.

Радуйся, от странников Божиих весть о слу­жении твоем людем со смирением приемый; радуйся, пророческое их проречение бого­тщательно исполнивый.

Радуйся, здравие приемый, да послужиши Исцелившему тя; радуйся, силу велию приемый, да прославиши ею имя Всесильнаго.

Радуйся, на службу Господу яко воин доблемудренный призванный; радуйся, дом ро­дительский служения ради Богу и земли сво­ей оставивый.

Радуйся, исцеление чудное милостию Божиею получивый; радуйся, дивный образ заступника обидимых в себе явивый.

Радуйся, преподобне отче Илие, земли Русския славный заступниче.

Кондак 4

Бурю злых напастей побеждая, прошел еси путь весь, тебе преднареченный, нося тяго­ты воинскаго служения, и тако благодатию

Божиею богозванный хранитель отечества своего и непобедимый воевода наше­му воинству явился еси, ратоборствовал бо еси, не земному князю угождая, но жела­нием и ревностию по Бозе полки иноплеменных побеждая. Темже благодарствен­но воспевал еси песнь хвалебную Господу: Аллилуиа.

Икос 4

Видевше разбойницы, с мечем ожидавшии тя на пути к матере градов русских, Киеву, небоязненное твое мужество и крепость во­инскую, убояшася, ты же презрел еси их дерзости и победил еси зломысливших на тя. Темже молим ти ся: разбойники пощадивый и к покаянию тех обративый, и наша ду­ши направи к покаянию и спаси молитвами твоими поющих тако:

Радуйся, на подвиги воинския и духовныя от родителей твоих благословенный; радуй­ся, благословение сие яко святыню до смер­ти соблюдый.

Радуйся, разбойников прещение ни во что же вменивый; радуйся, врагов, тобою побежден­ных, милосердием своим удививый.

Радуйся, вшедый в стольний град Киев яко воин боговоинственный и добропобедный; радуйся, от князей земли Русския достойно почтенный.

Радуйся, земнаго нашего отечества небесный защитниче; радуйся, правителем благоверным помощниче крепкий.

Радуйся, на подвиги воинския и духовныя вдохновителю; радуйся, обидящих и жестокосердых грозный вразумителю.

Радуйся, Небеснаго ради Отечества земно­му отечеству послуживый; радуйся, Богом возлюбленный и людьми воспеваемый.

Радуйся, преподобне отче Илие, земли Рус­ския славный заступниче.

Кондак 5

Боготечною звездою востекл еси, славный Илие_г ко святому граду Киеву, ревностию воспламеняем о защите земли Русския, сопротивныя побеждая и вражеския полки про­гоняя. И ныне наставлявши на путь служения отечеству земному, к Небесному Отечеству зовущи всех верных, поющих Богу: Аллилуиа.

Икос 5

Видевше тя, блаженне Илие, николиже во бранех побеждаема, невернии единаго имене твоего устрашахуся. Ты же, яко доблий воин Христов, на страже пребывал еси непоколебим, устрашая и прогоняя врагов видимых же и невидимых. Сего ради, поминающе веры мужественнаго поборника, про­славляем тя сице:

Радуйся, воине Христов, еще в земнем житии от Него славою венчанный; радуйся, и во сла­ве своей дух смиренномудрия соблюдый.

Радуйся, обидимых защитителю; радуйся, врагов множества видимых же и невидимых победителю.

Радуйся, силою креста во бранех укреплен­ный; радуйся, рукою Всевышняго во всех бранех дивно сохраненный.

Радуйся, невидимых врагов устрашение; ра­дуйся, воинства христианскаго защищение.

Радуйся, злобу и немощныя дерзости вра­гов отечества твоего посрамивый; радуйся, соотчичей своих защитниче верный.

Радуйся, воины отечества своего на победы умудрявый; радуйся, яко заступлением твоим и ныне страна наша миром ограждается.

Радуйся, преподобне отче Илие, земли Русския славный заступниче.

Кондак 6

Проповедуем подвиги твоя, Илие славне, ты бо, яко крепкий щит, ограждавши отечество наше непобедимым оружием, Божественною благодатию, дарованным ти свыше. Не лиши и нас, грешных, твоей помощи, тебе бо, по Бозе, самих себе и друг друга вве­ряем да воспеваем прославльшему тя Христу Богу: Аллилуиа.

Икос 6

Возсия слава подвигов твоих не токмо в преславнем граде Киеве, но и по всем градом и весем страны нашея. Темже людие доныне славу и благодарение Богу приносят и тебе, заступника своего, похвалами воспевают тако:

Радуйся, воинства крепосте несокрушимая; радуйся, победителю враг видимых и невидимых.

Радуйся, благочестивых воинов во бранех укрепляяй; радуйся, покровом молитв твоих в день брани тех осеняяй.

Радуйся, от нашествия иноплеменных на­ше ограждение; радуйся, от междоусобныя брани охранение.

Радуйся, яко великому мужеству твоему всяк возраст дивится, Бога славяще; радуйся, веру свою и любовь к Богу делы явивый.

Радуйся, соотчичей твоих любовию Хри­стовою возлюбивый; радуйся, яко и во иных землях прославлено бысть имя твое.

Радуйся, веледушный образ веры нам явивый; радуйся, ревностию святою о спасении ближняго присно пламеневый.

Радуйся, преподобне отче Илие, земли Русския славный заступниче.

Кондак 7

Хотя Человеколюбец Господь явити в жи­тии твоем, богомудре Илие, образ, не токмо воина христолюбиваго, но и лика иноческаго, чина ангельскаго тя сподобил во обители Киево-Печерстей, в нейже подвизался еси добре постом, бдением и молитвою, вос­певая непрестанно Богу ангельскую песнь: Аллилуиа.

Икос 7

Новую благодать во иночестем образе при­ем, преподобне Илие, новым подвигом укра­сил еси житие твое, подражая во всех добродетелех преподобным отцем Антонию и Фео­досию и прочим чудотворцем Печерским. Темже славим тя по достоянию и глаголем:

Радуйся, во ограду обители Киево-Печерския, спасения иский, пришедый; радуйся, постом, бдением и молитвами Христу Богу добре угодивый.

Радуйся, во ангельский образ достойно об­леченный; радуйся, паки и во иноцех Илия нареченный.

Радуйся, доспехи воинския на власяницу иноческую пременивый; радуйся, плоть свою духу покоривый.

Радуйся, яко в житии твоем Антонию дивному подражал еси; радуйся, яко в подвизех твоих Феодосию чудному ревновал еси.

Радуйся, подвигов иноческих ревнителю; радуйся, чистоты и воздержания хранителю.

Радуйся, в ризу смирения одеянный; радуй­ся, иноческия обеты до смерти соблюдый.

Радуйся, преподобне отче Илие, земли Русския славный заступниче.

Кондак 8

Странника и пришельца в мире сем помы­шлял еси себе быти, преподобне отче Илие, темже о земном всякое попечение отложше грядущаго града Иерусалима Небеснаго взыскуя, приносил еси Господеви житие преподобное, яко быти тебе во плоти Ангелу и небесному человеку, воспевая на всяк час ангельскую песнь Богу: Аллилуиа.

Икос 8

Весь облеклся еси во вся оружия Божия, яко воин Христов, препоясав чресла твоя истиною, оболкся бронею правды, восприял еси щит веры и шлем спасения, и меч духовный, имиже и возмогл еси вся наветы лукаваго победити. Помози убо твоими молитвами всем нам противитися искушением вражиим и подражати тебе в подвизех, воспевающе ти хвалы сия:

Радуйся, во обители Киево-Печерстей при­станище спасения стяжавый; радуйся, под кровом киевских чудотворцев подвиг иноческий совершивый.

Радуйся, преподобных Печерских духов­ный ученик бывый; радуйся, добродетелей их преемниче.

Радуйся, иноков Лавры Киево-Печерския украшение; радуйся, подвизающихся в ней благонадежное заступление.

Радуйся, приходящих в ню на поклонение благий предстателю; радуйся, обители твоей неотступный хранителю.

Радуйся, града Киева светлое радование; радуйся, всех призывающих тя ратоборче изрядный.

Радуйся, горняго мира жителю; радуйся, и ныне дольняго мира мудрый путеводче.

Радуйся, преподобне отче Илие, земли Русския славный заступниче.

Кондак 9

Все естество ангельское удивися преславней кончине твоей, отче преподобне, еюже житие твое достойно венчал еси. Такожде и земная церковь, небеснаго тя заступника со всеми чудотворцы Печерскими приемши, благодарив о тебе вопиет Богу: Аллилуиа.

Икос 9

Ветии многовещаннии недоумеют достой­но восхвалити и прославити подвиги твоя, преподобне отче наш Илие, яже прешел еси на земли. Но и по преставлении твоем в вечное царство славы не оставлявши нас, в пещерах киевских нетленными твоими мощами пребы­вая, в шуйце имый оружия язву, десницею же троеперстно сложенною веру утверждавши. Темже, яко живу ти сущу с нами, благодар­ным сердцем глас хвалы приносим ти:

Радуйся, богоугодное течение земное совершивый; радуйся, дух твой с веселием в руце Господни предавый.

Радуйся, пред кончиною персты десницы во образ Святыя Троицы сложивый; радуй­ся, к Трисолнечному Свету восшедый.

Радуйся, телом смертным во обители Печерстей погребенный; радуйся, душею же безсмертною к Сиону горнему воспаривый.

Радуйся, от обители земныя во Обителех Небесных водворивыйся; радуйся, честныя и многоцелебныя мощи твоя на исцеление недугов нам оставивый.

Радуйся, в сонме преподобных Печерских звездо богозарная; радуйся, Лавры Печерския вечная славо и присное радование.

Радуйся, преподобных печерских славный сподвижниче; радуйся, к Богородице молитвенниче наш неусыпный.

Радуйся, преподобне отче Илие, земли Русския славный заступниче.

Кондак 10

Спасти хотя землю Русскую от нашест­вий вражиих, Моисею и Давиду подражая, мужественно во бранех подвизался еси, отче преподобне. Темже и на Небеси с ними, яко победитель, молишися о воинствующих за правду и благочестие и благодарственно вопиющих Богу: Аллилуиа.

Икос 10

Стена еси и ограждение от врагов видимых и невидимых земли Русския, в нейже, отче наш Илие, жительствовал еси, и ныне пре­бывавши нетленным телом твоим. Сего ради и мы, грешнии, во дни искушений же и бед припадаем к тебе, слезно взывающи: сохра­няй и ныне отечество твое от нашествий иноплеменных, от раздоров и междоусобныя брани, да не погибнет Русь святая, величаю­щая тя сице:

Радуйся, дивную любовь ко отечеству зем­ному показавый; радуйся, по всей земли Богом прославленный.

Радуйся, страны нашея ограждение; радуй­ся, Православия в ней утверждение.

Радуйся, купно с Небесными Силами посекавый тьму вражию; радуйся, о мире всего мира пред Господем предстателю.

Радуйся, за други своя даже до смерти стояти научаяй; радуйся, в подвизех и страданиих за правду верных укрепляяй.

Радуйся, нетлением мощей твоих славно от Бога возвеличенный; радуйся, всем с ве­рою приходящим к ним исцеления подаваяй.

Радуйся, о всех градех и весех во обстоянии сущих молитвенниче; радуйся, яко молитвами твоими людие расточеннии любовию собираются.

Радуйся, преподобне отче Илие, земли Русския славный заступниче.

Кондак 11

Пение молебное, с любовию приносимое днесь в память твою, милостивно услыши, преподобне отче наш Илие, и буди во вся дни земнаго жития нашего благий наш пред­стателю и присный за ны ко Господу молитвенниче, да о тебе радующеся, вси едиными усты и единым сердцем прославят Бога, поюще Ему: Аллилуиа.

Икос 11

Светлое празднество твое, отче наш Илие, яко торжество веры и правды совершает свя­тая Церковь Христова, созывающи на духов­ную трапезу верныя чада своя. Приими убо гласы хваления тебе, небесному заступнику нашему, с любовию от нас возносимыя:

Радуйся, Церкве Христовой светильниче; радуйся, земный Ангеле и небесный человече.

Радуйся, яко с горящим светильником вшел еси в радость Христа, Господа твоего; радуйся, яко и нас благодатным светом про­свещаеши.

Радуйся, светом жития твоего страну на­шу озарявши; радуйся, яко, видяще подвиги твоя, Отца Небеснаго прославляем.

Радуйся, градом и весем надежное ог­раждение; радуйся, яко призыванием тя в помощники душевное утешение прием­лем.

Радуйся, блаженства святых сподоблен­ный; радуйся, сострадания к людем преис­полненный.

Радуйся, яко с преподобными и праведны­ми веселишися; радуйся, яко и нас блажен­ства их просиши Владыку сподобити.

Радуйся, преподобне отче Илие, земли Русския славный заступниче.

Кондак 12

Благодать мира и единения духовнаго людем всем, благоденствие земли нашей и тишину испроси у Бога, преподобне, яко от пагубных разделений свобождшеся, в мире воспоим прославльшему тя Единому Миротворцу всех Господу: Аллилуиа.

Икос 12

Поюще равноангельное житие твое, пре­подобне, хвалим, славим и величаем укрепившаго тя Господа, даровавшаго нам в тебе подвижника духовнаго яко образ достоподражательный до скончания века. Приими убо, угодниче Христов, от нас, с любовию тя почитающих, похвалы сия:

Радуйся, народом от враг видимых и невидимых небесный заступниче; радуйся, отечеству нашему печальниче нелицемер­ный.

Радуйся, яко твоим предстательством от раз­доров и междоусобий свобождаемся; радуйся, яко в почитании твоем воедино в Господе со­единяемся.

Радуйся, силы вражия благодатное одоле­ние; радуйся, воинскаго благочестиваго духа насаждение.

Радуйся, врагов спасения прогоняяй; ра­дуйся, скорбь нашу в радость претворяяй.

Радуйся, яко во успении своем нас не ос­тавлявши; радуйся, яко о прощении грехов наших Господа Бога умоляеши.

Радуйся, яко тобою милосердие Божие при­зываем; радуйся, яко тобою спасение вечное получити уповаем.

Радуйся, преподобне отче Илие, земли Русския славный заступниче.

Кондак 13

О предивный угодниче Христов, преподоб­не отче наш Илие, заступниче и воине земли Русския, приими от нас, недостойных, сие малое моление, с любовию тебе приносимое, и умоли Всеблагаго Господа силу свыше пра­вославному воинству подати, сохрани страну нашу, обитель твою и вся люди, к тебе прибегающия, от всякаго зла. Благоприятным твоим ходатайством испроси нам у Христа Бога прощения прегрешений наших, да с то­бою и всеми святыми в Царствии Небеснем сподобимся пети Спасителю нашему Богу: Аллилуиа.

(Этот кондак читается трижды, затем икос 1 и кондак 1.)

Молитва преподобному Илии Муромцу

О великий подвижниче и угодниче Хри­стов, преподобне отче наш Илие, ты в воинстем чине за имя Христово крепко подвизал­ся еси и соотчичи от враг ограждал еси. Ты, оставив славу земную, избрал еси безмолвное житие во обители Киево-Печерстей, и явился еси граду Киеву и обители твоей заступ­ник крепок.

О храбрый в ратех врагов прогонителю и обидимых заступниче, буди нам поборник на вся видимыя и невидимыя враги наша, помози и нам пребыти твердыми, непоколебимыми во искушениих, да твоею помощию и крепким предстательством посрамятся вси хотящии нам злая. Отче святый, ускори ныне на помощь, утверждая мир и тишину в земли нашей, и умоли Господа всех нас сохранити от глада, губительства, труса и по­топа, от огня и меча, от нахождения иноплеменных и междоусобныя брани, и от тле­творных ветр, и от смертоносный язвы, и от всякаго зла избавити, раздоры посреде братий бываемая умирити, отпадших паки в единомыслие привести и всех нас единени­ем духа и любве во Единей Святей Соборней и Апостольстей Церкви соединити.

Не забуди, святый отче, обитель твою, присно тя чтущую, и вся грады и веси тебе молитвенника крепка к Богу предлагающа, сохраняя их молитвами твоими от всякаго зла. Помяни всех, веру и любовь к тебе имущих, имя твое призывающих и на поклонение к мощем твоим святым приходя­щих, и вся благая прошения их милостиво исполни, и сподоби нас помощию твоею спасение вечное получити и Царствие Небесное наследовати, да славословим непрестанно Отца и Сына и Святаго Духа во веки веков. Аминь.

Молитва иная

О преподобне и богоносне отче наш Илие, града Мурома и всея земли Русския украшение, храбрый во бранех, врагов прогонителю и обидимых заступниче! Собраннии пред иконою твоею почитающии тя людие, молим тя, умоли Милосерднаго Бога, да милостив но услышит нас и дарует победу на сопротивныя; и паки, припадающе, молим тя: укрепи данною тебе благодатию во бранех воинство православное, разруши силы возстающих на ны врагов, да постыдятся и посрамятся, и дерзость их да сокрушится, и да уведят и уразумеют, яко Господь есть Защитник наш, по нам поборствуяй. О скорый наш помощниче и заступниче, укрепи молитвами твоими немощную волю нашу, во еже обрести нам мужество духовное и сокрушение о гресех наших. Ей, отче святый, не забуди нас, молящихся тебе о помощи, и сподоби нас, грешных, получити от Бога неизречен­ная благая, яже уготова любящим Его, яко да с тобою и со всеми святыми прославим Отца и Сына и Святаго Духа, ныне и присно и во веки веков. Аминь.

Тропарь преподобному Илии Муромцу, глас 4-й:

Приидите, вси вернии, песньми духовными почтим преподобнаго отца нашего Илию Муромскаго, светильника обители Печерския и всея Руси великаго заступника, образ под­вига воинскаго и духовнаго нам показавшаго, чудес благодатию ныне сияюща. Темже притекающе к раце мощей его, любовию це­луем и вопием: моли Христа Бога сохранити отечество наше и даровати нам велию милость.

Кондак, глас 8-й:

Яко светило великое Русския земли, Небеснаго Царя воевода непобедим был и мона­шествующих богодухновенное украшение. Ныне же со Ангелы престолу Божию пред­стоя, Владыку Христа, всех Творца, моли избавитися от всяких бед и скорбей чтущым святую память твою, да зовем ти: Радуйся, Илие, преподобне отче наш.

(2363)